محدش عاجب التاني

محدش عاجب التاني

كتب / اسلام المهدي –  Myzo Ata

 يا أكتر شعب موته يظيط

و هو عبيط، و هو مصدق الكدبة

و هو مكذب العالم

ولابس وشه وش الحيط

و عامل قال نبيه و حويط

و دايماً جاهل المصدر و بيروج

و دايما عاكس الأخبار و بيموج

يحب الفتي قد عينيه و يتمزج

ودا يأخده و دا يوديه و دا يجيبه

و دا في كل الحالات عيبه

و موته و سمه داء العيب دا ما يسيبه

و عارف من معاه و عليه

و مين ديبه و مين ميت في دباديبه

و مين صالبه ومين اللي تنيه

هتسألني انت تقصد ايه

هقولك هو يعني حرام

اقول افييه….؟

بقول افييه في وسط كلامي و هكمل

مهزرش…! و مألشي و معملشي

كمان أنا جو هأأأو

ما كله في عز عز الجد بيهرج

في عز المحنة بتفرج

مفيش دم و مفيش مخرج

ودا بيسف بسذاجة و بتفلحس

بيعمل فيها فرقع لوز و بتمهيص

و دا بيدين وهو مدان بإنه جبان

و دا بيبيع و مش خايف حقيقته تبان

و دا غلبان ودا شبعان

و دا غالي و دا بيرخص

و دا اصله و فصله مفيش

بقي عنده و انا معنديش

بقي ريس ما أنا كويس

و يجي مني متعرفنيش..؟!

و دي اكبر مشاكلنا محدش عاجب التاني

محدش راضي بالمقسوم

بندفع للنميمة رسوم

عشان جايبين في سيرة بعض

طول العمر حقد و لوم

و لا بنمل من التهويل

و دايماً نعشق التَأْويلُ

كأننا أهل للتفسير

و نطلع في النهاية حمير

بلاش قولنا و قالوا و شغل بغبغانات

علي الفاضي وعلي المليان بدون إثبات

بلاش إشاعات بلاش نصحي في زيف و نبات

بلاش يبقي الهطل عنوانا يا أخونا بلاش تفاهات

Share on FacebookShare on Google+Tweet about this on TwitterShare on LinkedIn

تعليقات facebook

تعليقات facebook

عن الكاتب

صوت بلدنا الاخباري

عدد المقالات : 3542

اكتب تعليق

© 2017 جميع الحقوق محفوظة لموقع صوت بلدنا الاخباري

Facebook Auto Publish Powered By : XYZScripts.com